Siglir tar il cuntegn

Exteriur Catalugna: Separatists restan a la pussanza

En la Catalugna restan ils separatists vinavant a la pussanza. Tar las elecziuns novas dal parlament ha il moviment per l'independenza da la Spagna defendì la maioritad absoluta. Quai tar ina participaziun da record dad 82%.

Massa cedels da votar sin ina maisa. Ils cedels vegna sortì.
Legenda: Ils cedels da votar da las elecziuns regiunalas vegnan dumbrads. Reuters

Suenter che quasi tut las vuschs èn dumbradas vegnan las trais partidas che stattan per l'independenza ensemen sin 70 dals 135 sezs. Cunquai cuntanschan ils separatists puspè la maioritad absoluta. 57 sezs van a partidas ch'èn cunter la separaziun da la Spagna. Suenter la votaziun da l'independenza ed il caos politic ch'è suandà l'october, vala l'elecziun dal parlament sco directiva.

Il schef da la regenza catalana da fin qua, Carles Puigdemont, ha declerà suenter l'elecziun ch'il stadi spagnol saja victorisà. L'Europa stoppia renconuscher che la schliaziun da Madrid na funcziunia betg. La cumissiun da l'UE ha però declerà ch'ins na midia betg la posiziun en la dumonda da la Catalugna.

RR novitads 06:00