Siglir tar il cuntegn
cuntegn

Exteriur Catalugna duai restar tar la Spagna

Retg Felipe VI da la Spagna è danovamain s’exprimì davart il conflict cun la Catalugna. Ils plans d’independenza da la regenza regiunala a Barcelona n’èn, tenor il retg, betg acceptabels. La Catalugna saja ina part da la Spagna e restia quai era en l'avegnir.

Il retg Felipe VI da la Spagna.
Legenda: Il retg Felipe VI da la Spagna. Keystone

Ins na possia betg construir in project dal futur cun divider la societad, ha ditg il retg da la Spagna Felipe VI a chaschun d’in’occurrenza en la citad dad Oviedo. La Catalugna saja ina part da la Spagna e vegnia er ad esser quai en l’avegnir.

La regenza centrala a Madrid communitgescha la sonda, tge mesiras repressivas ch’ella prendia cunter la regenza catalana. Tenor indicaziuns da politichers da l’opposiziun haja ella en mira novas elecziuns en la Catalugna. Silsuenter stuess il senat approvar questas mesiras.

Basa legala da las mesiras da la regenza centrala è l’artitgel 155 da la constituziun. Quest artitgel permetta al primminister Mariano Rajoy da restabilir l’urden public en ina regiun autonoma – pia concretamain da suspender l’autonomia da la Catalugna.

RR novitads 06:00