Passa dus onns suenter il mazzament da l’Afroamerican George Floyd tar ina brutala acziun da la polizia en ils Stadis Unids, sto in ulteriur ex-policist ir en praschun. Ina dretgira en il stadi federativ da Minnesota ha sentenzià Thomas Lane da 39 onns a dus onns e mez praschun. Quai rapportan medias americanas.
L’accusà principal Derek Chauvin è gia ordavant vegnì sentenzià a passa 22 onns praschun pervi da mazzament. Quest onn è el per ulteriurs 21 onns vegnì sentenzià. Il cas ha chaschunà protests en l'entir pajais e schizunt sur cunfins ora. Per part è la violenza escalada.
