Siglir tar il cuntegn

Header

cuntegn

Exteriur Canada: Vents chauds fan derasar l'incendi

Ils pumpiers quintan che la surfatscha pertutgada cuntanschi oz 3'000 kilometers quadrat. Quai correspunda a la surfatscha dal chantun Vad.

Las flommas sa muventan en direcziun nordost vers la provinza vischina Saskatchewan. Ils pumpiers speran entant cun ina midada da l'aura. Senza plievgia substanziala pudessian ils incendis anc arder sur mais, teman las autoritads canadaisas.

Evacuà in'entira citad

En la provinza canadaisa Alberta èsi grategià a millis da persunas dad ir en segirezza. En la citad canadaisa Fort McMurry han passa 88'000 persunas stuì fugir dal fieu. Ellas eran serradas en dals incendis da guaud. Ils abitants han pudì bandunar la citad en direcziun sid. La polizia e helicopters han surveglià l'evacuaziun. I sajan destruids almain 1'600 bajetgs en la citad. Il donn vegn schazegià sin passa set milliardas dollars americans.

Guauds ardan vinavant

Ils guauds enturn la citad da Fort McMurry brischan vinavant. Ils pumpiers fan tut lur pussaivel per limitar ils incendis e per evitar ulteriurs donns vi da chasas. I saja dentant da quintar che la surfatscha d'incendi sa dublescha.

Il fieu era rut or avant in'emna. La regiun pertutgada il pli ferm è la provinza Alberta, che giascha l'industria d'ieli canadaisa.

RR novitads 6:00

Artitgels legids il pli savens