Siglir tar il cuntegn
cuntegn

Exteriur Canada arresta scheffa da finanzas da Huawei

La scheffa da finanzas dal constructur da smartphones chinais Huawei è vegnida arrestada en il Canada. Tenor il ministeri da giustia canadais han ils Stadis Unids da l'America dumandà d'extradir ella.

biro cun logo da huawei
Legenda: Il concern da tecnologia Huawei sa dosta per sia scheffa da finanzas, la feglia dal fundatur da Huawei Ren Zhengfei. Keystone / archiv

Suenter avair arrestà la scheffa da finanzas da Huawei spetga ella sin la procedura d'audiziun ch'è previsa venderdi. Lura sa decidia quai, sche Meng Wanzhou po esser libra sin cauziun, communitgescha il minister da giustia canadais. Tenor rapports da medias vegn renfatschà a Meng Wanzhou d'avair cuntrafatg a las sancziuns ch'ils Stadis Unids han definì cunter l'Iran. Concret: Huawei haja furnì products americans en l'Iran.

Huawei sincerescha da sa tegnair vid leschas e regulaziuns

La firma Huawei ha entant confermà l'arrestaziun. Ins haja però anc paucas infurmaziuns davart las renfatschas. La firma na sappia en mintga cas nagut dad in cumportament illegal. Ins sa tegnia vid tut las leschas e regulaziuns – cumprais controllas d'export e sancziuns da las Naziuns unidas.

Ambassada protestescha

L'ambassada chinaisa en il Canada ha protestà cunter l'arrestaziun: Quella cuntrafetschia als dretgs umans. Meng Wanzhou n'haja cuntrafatg ni a leschas americanas, ni a las canadaisas. L'arrestaziun da la feglia dal fundatur dal concern ha era influenzà la bursa. A Shanghai e Hongkong èn las valurs da firmas da tecnologia crudads.

RR novitads 06:00