Siglir tar il cuntegn

Exteriur Cameron publitgescha sias datas da taglia

Sco emprim primminister englais insumma ha David Cameron publitgà sias datas da taglia. Uschia emprova el da sa defender cunter las pretensiuns da demissiuns suenter scuvertas en ils «Panama Papers».

Cameron dumonda perdun davant ses collegas da partida.
Legenda: Cameron dumonda perdun davant ses collegas da partida. Reuters

Il primminister da la Gronda Britannia David Cameron ha avant intgins dis concedì sia participaziun ad in’interpresa da chascha da brevs. Per sa deliberar dal squitsch enturn ils «Panama Papers» ha il politicher uss publitgà sia decleraziun da taglia.

In pass extraordinari

Igl è in pass nunusità, ma Cameron emprova uschia da cumbatter las pretensiuns ch’el duaja sa retrair da ses uffizi sco primminister.

Ils documents publitgads cumpiglian las decleraziuns da taglia dal schef da la regenza dals ultims sis onns. Tenor quels ha Cameron pajà radund 76’000 pfund taglia sin entradas da 200’000 pfund da l’onn fiscal 2014-2015. Las cifras per 2013-2014 sa movan en la medema dimensiun.

Al primminister na vegni betg rinfatschà d’avair agì a moda illegala. Crititgadas vegnan dentant sias quatter differentas posiziuns durant quatter differents dis, suenter che la participaziun da ses bab a fatschentas dad offshore era vegnida publica. Plinavant vegn crititgà che Cameron haja pir suenter quests schabetgs concedì in’atgna participaziun a la firma d'offshore.

Scuvert tschientmillis cas

Dapi in’emna rapportan la «Süddeutsche Zeitung» ed ina rait da retschertga internaziunala davart tschientmillis firmas che la chanzlia d’advocatura a Panama Mossack Fonseca ha fundà per clients bainstants sin l’entir mund en oasas da taglia.

Tranter quels duain sa chattar bunamain 130 politichers sco er 12 anteriurs e vertents schefs da stadis.

RR novitads 06:00