Siglir tar il cuntegn
cuntegn

Exteriur Bunamain 16'000 Renaults cun memi'autas valurs da svapur

Intgins vehichels da Renault produceschan en situaziuns normalas memia bleras svapurs. Il concern d'autos franzos cloma perquai enavos autos cun in motor da diesel. Pertutgads sajan 15’800 autos. Quai ha communitgà la ministra da l'ambient franzosa Segolène Royal a Paris.

Il logo da Renault.
Legenda: I dat differenzas: Las emissiuns da svapur da test na correspundan betg a quellas en situaziuns realas da traffic. Keystone

Renault vul preschentar las proximas emnas in plan per reducir las svapurs tar ils autos da diesel. Concret ha ina prova da controlla mussà valurs da CO2 ed oxid azotic memia autas.

Nagins indizis per software manipulada

Suenter ch’il scandal da VW era daventà enconuschent, aveva la Frantscha ordinà la controlla da 100 vehichels da differentas marcas. Sco Royal ha ditg, n’èn quellas controllas anc betg terminadas. Ella ha fatg attent, ch’autos d’intginas marcas surpassian las valurs lubidas; quai però senza numnar fabricants.

Tenor la regenza franzosa na datti il mument naginas indicaziuns che la software dals autos saja vegnida manipulada, sco quai ch'igl è stà il cas tar VW.

RR novitads 20:00