Siglir tar il cuntegn
cuntegn

Exteriur Brüssel: Schuldà ha impedì attatga da terror

Suenter l'attatga da terror supponida en la chapitala beltga Brüssel è mort il suspectà, quai communitgescha la procura publica. Suenter in'explosiun en la staziun principala da Brüssel è l'um vegnì sajettà giu d'in schuldà.

Purtret da l'inscripziun da la staziun principala da Brüssel.
Legenda: A la staziun principala hai da in'attatga terroristica la saira passada. Keystone

La procura publica ha ussa infurmà che l'um suspectà haja gì 36 onns e saja stà Marocan. I haja dà duas explosiuns a la staziun. Sco emprim ina pli pitschna e suenter ina pli gronda. In schuldà ha sajettà giu l'um suenter l'attentat cura che quel è currì encunter ad el, clamond «Allahu Akbar». L'um n'è betg stà enconuschent a la polizia avant.

L'explosiun saja capitada gist sper il suspectà ha communitgà la polizia. Tenor rapports da perditgas haja l'um curt avant clamà «Allahu Akbar». Autras persunas na sajan betg vegnidas blessadas. Il cas vegn tractà da la procura publica sco act da terror.

Panica suenter expolsiun

L'explosiun aveva effectuà panica en la staziun principala da Brüssel e sin ils perrons. Sin quai era la staziun vegnida evacuada, il traffic da tren era vegnì interrut. Tenor la polizia saja la situaziun sut controlla. Nagin saja vegnì blessà.

Era la societad da viafier SNCB ha confermà ch'il traffic da viafier saja vegnì interrut sin ordinaziun da la polizia.

RR novitads 06:00++