Siglir tar il cuntegn

Header

Navigaziun

Controllas da cunfin tranter Germania ed Austria.
Legenda: Controllas da cunfin tranter Germania ed Austria durant il settember da quest onn. Keystone
cuntegn

Exteriur Brüssel approva controllas da cunfin

L’agir da serrar temporarmain ils cunfins da la Germania e da l’Austria n’ha betg cuntrafatg a las reglas da la zona da Schengen. Quai ha la cumissiun da l’Uniun europeica communitgà.

Las controllas sajan stadas necessarias: la Germania e l’Austria hajan agì uschia, perquai che la segirtad dal pajais era periclitada, scriva la cumissiun da l’UE.

Il cas d'excepziun lubescha controllas fin 2 onns

En vista a talas situaziuns da privel lubeschia il codex da cunfin da Schengen temporarmain ina controlla dals cunfins. Questas controllas pon vegnidas prolungadas mintgamai per 20 dis, fin il temp maximal da 2 mais. En cas extrems, nua che la funcziun da l’intschess da Schengen è periclitada, dastgan controllas perfin vegnidas fatgas durant 2 onns.

Il cas normal prevesa naginas controllas

En general na prevesa la cunvegna da Schengen dentant betg pli controllas da cunfin tranter ils stadis commembers. Perquai eran las controllas - introducidas da la Germania e da l’Austria mez settember - vegnidas crititgadas ed i era vegnì admonì ch’ellas cuntrafetschian a la cunvegna da Schengen.

RR novitads 15:00