Cunzunt en la vischinanza da Kamloops en la provinza canadaisa British Columbia ardia quai, scrivan medias localas. Pliras vias en la regiun èn serradas. Plinavant han dus concerns da minieras chalà cun lur lavur.
Ils fieus èn vegnids chaschunads per gronda part da chametgs, dentant er dad umans. Il primminister Justin Trudeau ha empermess agid e proclamà il stadi d'urgenza. L’ultima giada era vegnì proclamà il stadi d’urgenza en tut la provinza l’onn 2003.
Incendis da guaud er en la California
Er en ils Stadis Unids, en California, ardan guauds. Radund 5'500 pumpiers cumbattan encunter las flommas. Da quai da 8'000 persunas han stuì bandunar las chasas. Il pli grond incendi è en la regiun tranter San Francisco e Los Angeles. Gia la fin d'emna avevan fieus da guaud destruì pliras milli hectaras guaud.
Unda da chalira extrema
Il sid da la California patescha actualmain d'ina unda da chalira extrema cun temperaturas fin a 39 grads. Tenor il servetsch d’aura naziunal saja vegnì rut a Los Angeles cun ina temperatura da 35,5 grads celsius ina valur da record, che valeva dapi 131 onns. La chalira e l'umiditad da l'aria ch'è fitg bassa sco er ils ferms vents han procurà ch'ils fieus èn sa derasads spert.
RR novitads 06:00