Siglir tar il cuntegn

Header

Navigaziun

Brev.
Legenda: La Gronda Britannia ha inoltrà uffizialmain la dumonda da sortir da l'UE a Brüssel. Keystone
cuntegn

Exteriur Brexit: Gronda Britannia ha inoltrà dumonda da sortir da l'UE

A Londra ha Theresa May suttascrit la brev da ses pajais per sortir da l’Uniun europeica. Il document è vegnì surdà mesemna a Brüssel. Uschia è la via libra per las contractivas da sortida.

Nov mais suenter il referendum davart dal Brexit è la dumonda uffiziala da la Gronda Britannia per sortir da l'UE vegnida inoltrada mesemna a Brüssel. Quai han communitgà il president dal cussegl da l'UE Donald Tusk e la primministra da la Gronda Britannia Theresa May.

Brexit entaifer dus onns

Uschia è la via libra per las contractivas da sortida. Entaifer dus onns ston las correlaziuns tranter l'UE e la Gronda Britannia vegnir schliadas. Passa 20’000 leschas e reglas èn pertutgadas. Il mars 2019 scada lura probabel la commembranza britannica en l'UE.

Novum per l'UE

La Gronda Britannia è l’emprim pajais che banduna l’UE. Ils Brits han vuschà il zercladur 2016 cun pitschna maioritad per ina sortida da l’Uniun europeica. Il mardi saira haja May anc telefonà cun il president da la cumissiun da l’UE Jean-Claude Junker e cun la chanceliera tudestga Angela Merkel. Tuts trais participants dals discurs sajan stads d’accord ch’i saja en l'interess da tuts che la Gronda Britannia stettia vinavant alliada stretgamain cun l’UE.

Reacziun da Confederaziun

Per la Svizra na midia il Brexit per entant nagut. Quai ha ditg la presidenta da la Confederaziun Doris Leuthard suenter la sesida dal Cussegl federal ch'è stada mesemna «extra muros» a Soloturn.

Nus vulain avair vinavant bunas relaziuns cun la Gronda Britannia sch’il pajais n'è ina giada betg pli en l'UE.
Autur: Doris LeuthardPresidenta da la Confederaziun

Impurtant saja ch'i dettia suenter il termin da contractivas naginas foras legalas. Vinavant ha Leuthard ditg che la Svizra dovria ina cunvegna da commerzi liber cun la Gronda Britannia. Per entant saja dentant anc memia baud per contractivas en chaussa.

RR novitads 06:00+