Il pajais dovria ina nova direcziun, ha ditg il politicher conservativ. Sco Cameron ha ditg a las medias a la Downing Street 10 veglia el restar ils proxims trais mais en uffizi. Uschia veglia el purtar stabilitad al pajais. Quai che saja segir è che la veglia dal pievel vegnia resguardada, ha ditg Cameron.
Il referendum divida però il reginavel. Entant che la Engalterra ed il Wales han sustegnì da sortir ord l’Uniun europeica, vulan la Scozia e l’Irlanda dal Nord restar en l’UE.
Uninu europeica vul sa tegnair ensemen
Suenter la votaziun davart il Brexit vulan ils ulteriurs 27 stadis commembers da l'Uniun europeica sa tegnair ensemen. Il GEA al Brexit chaschuna sentiments da solidaritad tar ils ulteriurs commembers.
Ins haja decis da vulair mantegnair l'unitad, ha ditg il president dal Cussegl da l'Uniun europeica Donald Tusk a Brüssel. I na saja uss betg il temp da reagir a moda isterica. Uss vegnia la cumissiun a proponer als 27 stadis commembers da far ponderaziuns davart l'avegnir da l'UE.
A l'ur da l'inscunter suprem che cumenza proxim mardi duai quai dar in inscunter informal, senza la Gronda Britannia. Per ils Brits valian però vinavant las reglas da l'UE fin che la procedura da sortida saja reglada, ha accentuà Tusk.
RR novitads 10:00+