Siglir tar il cuntegn
Inhalt

Exteriur Brasilia: Terrada per Dilma Rousseff

La chombra dals deputads ha vuschà per la relaschada da la presidenta Dilma Rousseff, e quai cun la maioritad necessaria da dus terzs.

Ils adversaris da la presidenta brasiliana Dilma Rousseff festiveschan la decisiun dal parlament
Legenda: Ils adversaris da Rousseff festiveschan la decisiun dal parlament Keystone

La procedura per ina relaschada ord l'uffizi ha surmuntà in obstachel decisiv. Gia avant che la maioritad da 342 deputads è stada cuntanschida ha la partida da lavur da Rousseff concedì la terrada. Il schef da fracziun José Guimaraes ha ditg durant la votaziun: «Ils conspiraturs dal culp da stadi han gudagnà».
Sco proxim decida il senat en chaussa. Sche quel di er gea vegn Rousseff suspendida en in emprim pass per 180 dis. Questa decisiun vegn probabel a crudar l'entschatta matg.

Renfatschas da corrupziun

A Rousseff vegn rinfatschà d'avair manipulà cifras da bilantscha per segirar sia reelecziun l'onn 2014. La presidenta dementescha questas reproschas e di che quai saja ina emprova da putsch envers sia regenza. Ils critichers rinfatschan ultra da quai a Rousseff ch'ella saja responsabla per la pli greva recessiun en la Brasilia dapi decennis.

Senat ha il davos pled

Uss ha il senat provisoricamain il davos pled en chaussa. Avant la votaziun entras il parlament avevan pliras vuschs ord il conturn dal senat ditg che lez na sustegnia betg la presidenta sch'il parlament sa decidia per la relaschada d'uffizi. Almain 41 dals 81 senaturs stuessan dir gea per che la procedura da relaschada possia cuntinuar. Sche almain dus terzs dals senaturs decidan cunter Rousseff lura vala ella sco culpanta e perda tut ils dretgs politics. Ils proxims otg onns na dastga ella en quest cas betg pli candidar per uffizis politics. En quest cas surpigliass ses rival Michel Temer las fatschentas enfin il december 2018.

RR novitads 6:00