Siglir tar il cuntegn
cuntegn

Exteriur Brasilia: Er l'opposiziun sut suspect da corrupziun

La procura publica da la Brasilia vul inoltrar ina procedura d'inquisiziun cunter il rival da la presidenta Dilma Rousseff, Aécio Neves e quai pervi da corrupziun. Il procuratur public general haja dumandà la pli auta dretgira per lubientscha d'entschaiver ad investigar cunter il senatur Neves.

purtret dal politicher brasilian Aécio Neves
Legenda: Il manader da l'opposiziun en la Brasilia, Aécio Neves, è en il visier da la procura publica. Keystone

A Neves vegn rinfatschà d'avair profità d'in sistem corrupt en il concern d'energia statal Furnas e d'avair prendì encunter daners da corrupziun. Il cas stat en connex cun il bler pli grond scandal dal concern dad ieli statal Petrobras. Neves refusa las renfatschas. Il senatur n'haja fatg nagut fauss e las renfatschas sa basian sin famas. I na dettia nagins mussaments per irregularitads, ha communitgà il biro da Neves.

Il 2014 aveva Neves pers stgarsamain l'elecziun dal presidi cunter Dilma Rousseff. A lezza smanatscha da stuair sa retrair pervi da suspect da corrupziun.

RR novitads 06:00