Cunter Cunha duai vegnir fatg in process pervi da corrupziun. Il politicher duai avair incassà 5 milliuns dollars daners da corrupziun. L’agentura da novitads Reuters rapporta che Cunha duai avair zuppentà in conto sin ina banca svizra. El sez refusa las reproschas. Gia ha Cunha annunzià da far recurs cunter la decisiun da la cumissiun etica.
Era cunter la dunna da Cunha vegn investigà
Gia l’entschatta da l’emna aveva l’uffizi da giustia da la Brasilia avert las inquisiziuns cunter Cunha sco era cunter sia dunna. I va cunzunt per pajar enavos daners da corrupziun. Las autoritads da giustia pretendan uss da serrar Cunha per tut ils uffizis publics per 10 onns.
Dispita da Rouseff cunter Cunha
En la dispita tranter Dilma Rousseff e Eduardo Cunha aveva Cunha sco president dal parlament bloccà pliras refurmas, quai malgrà che sia partida (Il moviment democratic) era en ina colliaziun politica cun la presidenta fin il mars. Cunha era alura vegni suspendì da la dretgira suprema brasiliana quai pervi ch’el haja impedi investigaziuns cunter el. Dapi il mez matg è la president Rousseff uss suspendida da ses uffizi. La Brasilia è pervi da las intrigas politicas gia dapi emnas sco paralisada
RR novitads 06:00