Siglir tar il cuntegn
Inhalt

Exteriur Brasilia: Dilma Rousseff duai ir

Il senat brasilian ha decidì cun gronda maioritad d'approvar la procedura da la relaschada d'uffizi cunter la presidenta Dilma Rousseff.

Parlament.
Legenda: Il senat è s'exprimì da relaschar la presidenta Dilma Rousseff. Keystone

En paucas emnas po uschia vegnir votà davart la relaschada. Suenter ina seduta da bunamain 17 uras ha il senat permiss la procedura cun 59 cunter 21 vuschs cunter la scheffa da stadi ch'è il mument suspendida. Ils parlamentaris han uschia confermà l'expertisa d'ina cumissiun extraordinaria che ha sustegnì la denunzia cunter Rousseff pervi da manipulaziuns vid il budget.

Michel Temer pudess succeder definitivamain

Radund duas emnas suenter ch'ils gieus olimpics da Rio vegnan ad esser a fin pudess la Brasilia uschia survegnir cun Michel Temer definitivamain in nov president. Il vicepresident da fin qua è vegnì elegì la fin da matg sco president interimistic per 180 dis suenter la suspensiun da Dilma Rousseff. A la festa d’avertura dals gieus olimpics è el vegnì tschivlà ora.