Siglir tar il cuntegn

Header

cuntegn

Exteriur Bonjour Macron – adieu Hollande

En ses emprim discurs ha il nov president franzos Emmanuel Macron empermess da vulair unir il pajais e s’engaschar per refurmas en l’Uniun europeica. In’emna suenter ch’el è vegnì elegì surpiglia el ils affars da l'antecessur François Hollande.

Ulteriuras sfidas per ses temp d’uffizi èn - tenor Macron – il terrorissem, la midada dal clima, la migraziun ed ils excess dal chapitalissem.

La damaun è Emmanuel Macron vegnì retschaivì dal schef da stadi partent François Hollande en il palazi da l’Elysée. Suenter il bainvegni eran els sa retratgs ad in discurs confidenzial.

Il midament dad in president a tschel segua ad in protocoll fix

Lura ha Macron dà adia a ses antecessur en uffizi ed ha tegnì ses emprim pled sco president da la Frantscha. El è otgavel president da la Frantscha dapi la fundaziun da la tschintgavla republica tras il General Charles de Gaulle.

I seguan divers puncts da program tenor in protocoll exact. Il punct culminant vegn ad esser il viadi sur il Champs-Elysées, la via pli pompusa da Paris.

Per garantir la segirezza durant las ceremonias d’entrada en uffizi da Macron èn var 1’500 policists en acziun.

Schef da l'armada e da las bombas atomaras

Cun surpigliar l’uffizi surpigli Macron er il commando da l’armada franzosa e la «force de frappé», las bombas atomaras, scriva la gasetta NZZ. La Frantscha saja cun in arsenal da var 300 elemaints explosivs nuclears la forza atomara la terz gronda en il mund.

Actualmain è schuldada franzosa en acziun cunter gruppas terroristicas en la zona da Sahel en Africa ed en l’Oriaint cun cumbatter il Stadi Islamic SI en l’Irac ed en la Siria.

Si’emprima gronda decisiun vegn el a communitgar damaun: Macron vegn a nominar ses primminister.

RR novitads 12:00

Artitgels legids il pli savens