Siglir tar il cuntegn

Exteriur Böhmermann annunzia «pitschna pausa da televisiun»

Il satiricher Jan Böhmermann ha annunzià ina pausa da televisiun da quatter emnas. Quai suenter l’affera enturn ina poesia disfamanta cunter il president tirc Recep Tayyip Erdogan. Fin ils 12 da matg na duai quai naginas novas episodas da ses «Neo Magazin Royale», ha confermà ses emettur ZDF.

Ha per il mument avunda: Jan Böhmermann (montascha).
Legenda: Ha per il mument avunda: Jan Böhmermann (montascha). SRF/Imago

Suenter l’intensiva debatta davart sia poesia cunter Erdogan entran il moderatur dal ZDF Jan Böhmermann e la firma da producziun btf en ina pausa da producziun da quatter emnas.

Quai ha annunzià l’emettur da Mainz ed ha uschia precisà las decleraziuns da Böhmermann, il qual aveva curt avant annunzià «ina pitschna pausa da televisiun» via Facebook. Il messadi original da Böhmermann sin Facebook para entant da betg pli esser accessibel.

«Il ZDF respecta questa decisiun», hai num en ina curta posiziun. Tge emissiun che remplazzia il «Neo Magaziun Royale» da Böhmermann, na saja fin uss anc betg decis. La pausa da producziun duai cuzzar fin ils 12 da matg. L’emissiun da Böhmermann era fin uss mintgamai da guardar la gievgia saira sin l’emettur da sparta ZDFneu sco er il venderdi la saira tard sin l’emettur principal.

Legende: Video Ina poesia bitta grondas undas abspielen. Laufzeit 2:32 Minuten.
Or da Minisguard dals 15.04.2016.

Pervi da sia poesia disfamanta aveva la Tirchia purtà plant cunter il satiricher. Il venderdi aveva la regenza tudestga lubì ina procedura d’inquisiziun cunter Böhmermann. Quai aveva la chanzeliera Angela Merkel fatg cunter il votum das ses minister da la SPD. A medem mument aveva Merkel annunzià da vulair stritgar l’artitgel correspundent ord il cudesch da dretg penal fin il 2018.

RR novitads 18:00