Siglir tar il cuntegn
Inhalt

Exteriur Blatter sa dosta

Il schef da la FIFA, Sepp Blatter ed il president da l'UEFA, Michel Platini han annunzià da far recurs cunter la decisiun da la cumissiun d'etica da la FIFA. Lezza ha decidì ch'els dus vegnan suspendids per 8 onns. Uschia chastia la cumissiun in pajament da 2 milliuns francs da Blatter a Platini.

La cumissiun d’etica da la FIFA suspenda Joseph Blatter e Michel Platini per 8 onns. Durant quest temps na dastgan omadus avair nagina funcziun en il ballape internaziunal. Il schef da l’UEFA Platini na vegnia uschia pli probabel betg a pudair candidar per il presidi da la FIFA.

Blatter fa recurs

Sepp Blatter en discurs cun Michel Platini.
Legenda: Sepp Blatter en discurs cun Michel Platini. Keystone

Omadus ston en pli er pajar in chasti: Per Blatter èn quai 50’000 francs e per Platini 80’000 francs. En ina conferenza da medias ha Blatter annunzià da betg vulair acceptar sia suspensiun. El veglia contestar questa tar la cumissiun d'appelaziun da la FIFA, tar il tribunal da sport CAS a Losanna ed avant la giustia Svizra. Omadus avevan gia ditg avant la decisiun da la cumissiun etica ch’els vegnan a recurrer cunter la decisiun per cas ch’els vegnian chastiads.

Dus milliuns da Blatter per Platini

Blatter e Platini èn accusads perquai che Blatter aveva pajà il 2011 dus milliuns francs a Platini. Omadus han pretendì che quest pajament saja sa basà sin in contract a bucca. I saja in pajament d'in onurari per servetschs da Platini dals onns 1998 fin il 2002. Ils accusaders da la FIFA èn dentant da l’avis ch'i sa tracti da daners da corrupziun ubain da cumpras da vuschs.

RR novitads 10:00