Siglir tar il cuntegn
Inhalt

Exteriur Bilantscha grondiusa: Donald Trump da sias emprimas quatter emnas

Suenter bunamain quatter emnas sco president dals Stadis Unids fa Donald Trump ina bilantscha ordvart positiva da ses temp d’uffizi da fin uss. Quai cuntrari a la critica vehementa da tut ils champs politics.

Trum vi dal pult da discurrer.
Legenda: Il president american tar ina conferenza da pressa ils 16 favrer en la Chasa alva. Keystone

El haja tegnì e realisà tut sias empermischuns electoralas – ha ditg Trump a Washington. Tenor sia atgna valitaziun haja strusch in auter president gì uschè bler success sto el en in tal curt temp. El fruntia sin grond’acceptanza ed i dettia in’unda d’optimissem en il mund da lavur.

Il stadi actual da sia regenza saja exactamain il cuntrari da caos. Questa regenza lavuria sco ina maschina bain accordada, ha ditg Trump. I saja la culpa dals democrats, che ses cabinet na vegnia betg confermà, quai tegnia si bler.

Trump ha repetì e rinforzà sia critica envers las medias. El sa drizzia uss directamain al pievel american cun quai che las medias refuseschian da rapportar la vardad. Ellas taschentassan ils success da sia regenza. Ellas sajan «dil tuttafatg ord controlla».

RR novitads 09:00