Berlusconi vul restar president da la Forza Italia

L'anteriur primminister talian Silvio Berlusconi vul restar a la testa da sia partida Forza Italia. I na vegnia a dar nagina midada al timun, ha el ditg envers differentas medias.

Silvio Berlusconi.

Legenda da maletgs: Silvio Berlusconi vegn probablamain operà il mardi vid il cor. Keystone

Ina pledadra la partida conservativa da la dretga ha dementì rapports nua ch'i vegn pretendì ch'in gremi vegnia a manar da nov la partida. Silvio Berlusconi vegn probablamain operà il mardi vid il cor.

Fin ch’el è puspè sa revegnì cuzzia probabel in mais, uschia la pledadra. Suenter problems dal cor acuts aveva Berlusconi stuì ir en l’ospital la dumengia saira. Ses collavuraturs sminan ch’el saja sa strapatschà en il cumbat electoral.

RR novitads 12:00