Siglir tar il cuntegn
Inhalt

Exteriur Berlusconi: Comeback è pussaivel uss

Suenter sis onns abstinenza cumandada pervi da fraud fiscal dastga Silvio Berlusconi (81) puspè surpigliar in uffizi politic, citescha l’agentura da novitads svizra SDA la gasetta «Corriere della Sera».

Els trais en in pierten.
Legenda: Via libra per in comeback – Silvio Berlusconi (a dr.) cun Matteo Salvini (Lega) e Giorgia Meloni (Fratelli d'Italia) suenter in discurs en il Quirinal a Roma. Keystone

Ina dretgira a Milano ha dà suatientscha a la dumonda da Silvio Berlusconi da reabilitar el suenter la sentenzia pervi da fraud fiscal l'onn 2011. Atgnamain avess l'impressari da medias anc stuì spetgar fin il 2019.

Pervi dal scumond da surpigliar in uffizi n'aveva Berlusconi, il manader da la partida «Forza Italia», betg dastgà candidar per quella tar las elecziuns parlamentaras dal mars passà.

Per l’um, ch’era quatter giadas president da la regenza taliana, era quest scumond zunt murdent: L’allianza dal center e la dretga – tranter auter cun la partida da dretga Lega – aveva gudagnà il mars 36% tar l’electorat taglian. Sche la furmaziun dad ina regenza cun il moviment tschintg stailas e la Lega fa naufragi, pudessi dar elecziuns novas – ed uschia puspè la pussibilità da candidar per Silvio Berlusconi.

RR novitads 09:00