Tar ina conferenza da medias il mardi suentermezdi avevan plirs uffizials punctuà, ch'i na saja anc ditg betg cler che l'um arrestà saja lu era propi il manischunz tschertgà. Ed els na sajan era anc betg segirs, sch'i sa tractia d'ina u da pliras persunas che sajan involvidas en l'attatga a Berlin. Vinavant ha il minister da l'intern tudestg de Maizière communitgà, che fin uss na haja nagin'organisaziun u gruppaziun surpiglià la responsabladad per l'attatga. Indizis sin in motiv islamistic na datti il mument betg.
L'attatga sin ina fiera da Nadal a Berlin è succedida il glindesdi saira las otg. Tenor indicaziuns da la polizia aveva ina persuna manischà sapientivamain in camiun en la fulla da glieud, ch'era sa rimnada sin la plazza Breitscheid avant la Gedächtniskirche. L'oriund manischunz dal camiun polac ha la polizia chattà sajettà en la cabina dal camiun.
Pliras persunas han pudì bandunar l'ospital
L'attatga ha chaschunà 12 unfrendas e 49 blessads. Tenor las davosas indicaziuns han entant 24 persunas pudì bandunar l'ospital. 14 da las 25 persunas che sa chattan anc en tractament han 14 blessuras pli grevas.
Suspectà è var in onn en Germania
L'um suspectà ch'era stà en arrest ha 23 onns e duai esser oriund dal Pakistan. El era arrivà ils 31 da december 2015 en la Germania. Il favrer 2016 era el sa mussà a Berlin. Davart sia dumonda d'asil n'avevan las autoritads anc betg decidì. Contacts cun circuls islamistics n'èn tenor la polizia betg enconuschents.
RR novitads 14:00++