Siglir tar il cuntegn
cuntegn

Exteriur Belgia vul rinforzar cumbat cunter islamists violents

La Belgia vul rinforzar il cumbat cunter islamists violents cun ulteriurs 400 milliuns euros. Tar las mesiras supplementaras tutgan l'arrestaziun d'adherents da la gruppa da terror Stadi Islamic che turnan da la Siria en Belgia. Quai ha annunzià il primminister Charles Michel.

In um traversa la plazza da Molenbeek a Brüssel en Belgia.
Legenda: La Belgia vul scumandar la vendita anonima da cartas da SIM per telefonins. Keystone

Il schef da la regenza beltga è plinavant s'exprimì per controllas pli severas als cunfins exteriurs da l'Uniun europeica. Ultra da quai duai quai dar leschas pli rigurusas cunter predicaturs d’odi. Era duain lieus d’uraziun betg renconuschids vegnir serrads.

La Belgia stat en il center da las inquisiziuns pervi da las attatgas dal venderdi a Paris. Almain 2 attentaders vivan tenor las enconuschientschas da fin qua en Belgia.

Er la Svezia vul rinforzar las leschas da segirtad

Il primminister svedais Stefan Löfven ha annunzià in pachet cun pliras mesiras da segirtad. Ils servetschs secrets e las autoritads da giustia duain survegnir dapli cumpetenzas per controllar la communicaziun sur l'internet. Era l'intenziun da persunas da vulair ir a l'exteriur per far attatgas da terror ed en camps da scolaziun duai esser chastiabel en Svezia.

RR novitads 11:00