Siglir tar il cuntegn
Inhalt

Exteriur Be paucs fugitivs èn arrivads a Buchs

A la staziun da Buchs en il chantun Son Gagl n'hai betg dà la fulla da fugitivs ch'ins aveva spetgà. Oz èn strusch in tozzel arrivads a Buchs. Damai che la gronda part d'els vegn probabel a dumandar per asil èn els vegnids transferids en il center per requirents d'asil ad Altstätten.

In um pli passà e dus giuvens vegnan accumpagnads da la staziun da Buchs al post da polizia.
Legenda: In um pli passà e dus giuvens vegnan accumpagnads da la staziun da Buchs al post da polizia. Keystone

Era il Grischun persequitescha, tge che capita il mument al cunfin a Buchs: e quai era sch'il Grischun n’è betg pertutgà directamain. «Esser quietads na possian ins en mintga cas betg esser en questa situaziun», ha ditg il cusseglier guvernativa Christian Rathgeb.

«Nus essan en fitg stretg contact cun il secretariat statal per la migraziun e nus essan pronts sch’i fa da basegn.»

Ils fugitivs ch'èn arrivads, survegnan sco emprim dimora en in center da retschaviment ad Altstätten, nua che la procedura d'asil da la Confederaziun entschaiva.

Situaziun resta tendida

La situaziun a Budapest resta entant tendida en l'Ungaria. Suenter ch'ella ha limità l'access als trens, spetgan passa 1'500 fugitivs a la staziun en l'ost da la chapitala.

Er sin las Inslas Egeicas saja la situaziun dals fugitivs desolata, sco l'agentura da novitads dpa scriva: Passa 23'000 fugitivs sajan ils ultims dis arrivads sin las inslas greccas. Tenor l'autoritad da protecziun da cunfin da l'UE, Frontex, è quai in augment da 50%.