Il cumbat per Aleppo haja cuntanschì sia fin. Quai ha ditg Rami Abdel Rahman, il directur dal Post sirian per l'observaziun dals dretgs umans a Londra. El ha discurrì d'in collaps total dals rebels. Uss restia mo anc in pitschen sectur en l'ost d'Aleppo sut lur controlla.
Gia avant aveva declerà l’armada siriana, che la sconfitta dals rebels saja damanaivla. Als rebels na restia betg pli bler temp, uschia il litinent general Said Al-Saleh. Ils rebels possian «sa suttametter u murir».
Aleppo era anc fin dacurt separà en in sectur dal vest, controllà da l’armada siriana, ed in da l’ost, controllà dals rebels. Dapi la mesadad da november fa l’armada siriana in’offensiva gronda per reconquistar tut la citad dad Aleppo. Er dapi lura èn fugids var 130’000 umans or dals quartiers controllads dals rebels.
RR novitads 15:00
