Siglir tar il cuntegn

Header

cuntegn

Exteriur Bagdad – la cifra da victimas crescha sin 213

L’attentat da suicidi da la dumengia en la chapitala iracaisa ha custà la vita a bler dapli persunas che supponì. Il Stadi Islamic è sa declerà responsabel en la rait.

Il dumber da las unfrendas è vegnì curregì da 119 sin almain 213. Passa 200 ulteriuras èn vegnidas blessadas cura ch’in camiun cun ina chargia da material explosiv e detunà en il district da butias Karrada. Ils attentaders han attatgà las vias da Bagdad gest en quel mument cura ch’il mais da giginar tradiziunal , il ramadan è ì a fin. Perquai eran bleras persunas sin las vias vid il festegiar.

L’attentat vala sco il pli grev ch’è succedì quest onn a Bagdad. Dapi il favrer èn mortas 587 persunas tar 8 attatgas da suicidi, rapporta l'emettur BBC.

Al-Abadi en ina chasa, discurrind en il microfon.
Legenda: Il primminister al-Abadi - qua discurrind en in microfon a Falludscha, ina da las bastiuns dal SI. Keystone

Ravgia sin la regenza

Tar sia visita al lieu d'attentat ha il primminister Haider Al-Abadi empermess da punir ils responsabels per l’attatga. Ils abitants èn dentant ravgentads da la regenza che na saja betg capabla d'impedir talas attatgas.

Stadi islamic è sa declerà responsabel

La milissa da terror Stadi islamic è sa declerada responsabla en la rait tar in dals 2 attentats. Ils ultims mais ha la gruppa stuì prender encunter sconfittas en l’Irac ed en Siria. Independent da quai controllescha il Stadi islamic inavant vastas parts dal pajais. La segund-gronda citad iracaisa, Mossul è anc adina en ils mauns dals dschihadists.

RR novitads 11:00

Artitgels legids il pli savens