Mardi è vegnì vuschà en ils Stadis Unids. Pir uss è dentant la decisiun clera. Joe Biden gudogna las elecziuns americanas 2020. El dumogna tenor «CNN» l'elecziun en Pennsylvania e vegn uschia actualmain sin 273 vuschs d'electurs. Necessarias fissan 270 vuschs. Joe Biden è uschia il 46avel president dals Stadis Unids.
Era l'emettur da televisiun Fox ha entant declerà Joe Biden sco victur da l'elecziun presidiala. L'emettur stat fitg datiers dal president actual Donald Trump.
Trump refusa
Il president en uffizi Donald Trump ha annunzià da betg vulair renconuscher la victoria da Biden. L'elecziun na saja anc ditg betg terminada, ha communitgà Trump. En plirs stadis federativs vul el instradar pass giuridics cunter ils resultats. Trump ha pretendì pliras giadas ch'i dettia fraud electoral, n'ha dentant betg numnà u purtà mussaments.
Giubel en las citads
Be secundas suenter che pliras medias americanas han declerà Joe Biden sco victur da las elecziuns hai dà gronds givels en bleras metropolas e citads grondas. Sin las vias a New York han ils umans sblatschà, sbragì e giubià. Tschients èn ids al Times Square. Emetturs da televisiun han er mussà maletgs da Philadelphia a Pennsylvania e davant la Chas'Alva a Washington nua ch'ils umans han giubilà e festivà.
Gratulaziuns da tuttas varts
La presidenta da la Confederaziun Simonetta Sommaruga ha gratulà sin twitter al nov president american Joe Biden e sia vicepresidenta Kamala Harris. L'elecziun saja in ferm signal, uschia Sommaruga. La Svizra saja persvadida ch'ella possia cuntinuar cun la nova administraziun las relaziuns excellentas cun ils Stadis Unids. - Er auters schef da regenza e presidents da stadi sco Emmanuel Macron, Boris Johnson ed Angela Merkel han gratulà. Cun Mitt Romney ha er in emprim senatur republican gratulà a Biden. L'anteriur candidat per la presidenza vala sco criticher da Donald Trump.
Appel dad Obama
L'anteriur president american Barack Obama ha appelà a tuttas Americanas e tuts Americans da dar ina schanza a Joe Biden e da sustegnair el sco proxim president dal pajais. Biden saja confruntà sco nagin auter president cun ina retscha da sfidas extraordinarias, ina pandemia, in sistem inegual d'economia e giustia, ina democrazia periclitada ed in clima periclità, scriva Obama. I dovria uss betg mo Biden e sia vicepresidenta Kamala Harris mabain sin mintga singul da contribuir sia part ch'ils umans chattia puspè la via in tar l'auter.
