Aviun militar crudà – «nagins survivents»

La maschina era partida a Sotschi. Tuttas 92 persunas a bord èn mortas. Tranter quellas er ils commembers dal chor Alexandrow che vuleva dar in concert en la Siria.

Las forzas da salvament chattan en la mar tocca dal vrac da  l'aviun e restanzas umanas.

Legenda da maletgs: Las forzas da salvament chattan en la mar tocca dal vrac da l'aviun e restanzas umanas. Keystone

Forzas da salvament hajan chattà tocca dal vrac davant la costa da la citad Sotschi, communitgescha il ministeri da defensiun russ. Tut las persunas a bord sajan mortas.

Aviun.

Legenda da maletgs: In aviun dal tip TU-154 cun in chor da l'armada russa a bord è crudà giu. Keystone

«Critic problem tecnic»

La maschina dal tip Tupolew TU-154 cun 92 persunas a bord saja stada sin via da la citad sid-russa Sotschi en direcziun da la Siria cura ch'ella saja svanida dal radar.

Il contact cun l’aviun saja rut giu radund 10 kilometers suenter il start. Tar in manever durant il sgol d’ascensiun haja quai pudì dar in «critic problem tecnic», uschia las autoritads envers l’agentura da novitads Interfax.

Er in sbagl dals pilots militars na vegnia betg exclus, malgrà ch’els eran rutinads.

A bord saja tranter auter il chor d'armada renumà Alexandrow che vuleva dar in concert sin ina basa da l’aviatica militara en la Siria. Ultra dals saltunzs e chandadurs dal chor eran a bord schurnalists e persunal da l'aviun.

Di da malencurada naziunala il glindesdi

Il chor Alexandrow il 2013 durant in concert en la Tunesia.

Legenda da maletgs: Il chor Alexandrow il 2013 durant in concert en la Tunesia. Keystone (archiv)

Il president russ Wladimir Putin ha annunzià per il glindesdi e per l’entir pajais in di da malencurada per las 92 unfrendas da l’accident sur la Mar Naira. La dumengia ha el condolà a famiglias ed amis dals morts, sco il Kreml communitgescha.

«I vegn a dar ina minuzius’examinaziun da las raschuns da la catastrofa, ed i vegn fatg tut per garantir il sustegn a las famiglias dals morts», ha ditg il president.

RR novitads 07:00 / 10:00 / 14:00