Siglir tar il cuntegn

Exteriur Aviun cun 66 persunas è crudà en l'Iran

Tenor la societad aviatica iranaisa Aseman Airlines èn stadas 66 persunas a bord da l'aviun dal tip ATR-72. Il dumber exact da las unfrendas n'è betg confermà.

aviun e logo da la aseman airline
Legenda: La societad aviatica iranaisa Aseman Airlines vala tenor la cumissiun da l'UE sco societad malsegira. Reuters

L'aviun aveva 60 passaschiers e 6 persunas da persunal a bord, cura ch'el sgulava da l'eroport Teheran-Mehrabad a Yassudsch en l'Iran dal sidvest, communitgescha la societad aviatica iranaisa Aseman Airlines. Curt avant la citad da Semirom, saja l'aviun collidà cun ina muntogna e crudà. Tenor l'agentura da novitads iranaisa Fars èn las unitads da salvament sin via.

Dumber da las unfrendas n'è betg cler

Il dumber exact da las unfrendas na possian ins anc betg inditgar, citescha l'agentura da novitads Isna in pledader da la societad aviatica. Tras circumstanzas spezialas en la regiun n'hajan gidanters anc betg access al lieu da la crudada da l'aviun dal tip ATR-72. Tgeninas circumstanzas spezialas concretas che quai è n'ha la societad aviatica betg concretisà.

Societad aviatica sin glista naira

La societad aviatica Asemann Airlines è actualmain sin la glista naira da la cumissiun da l'Uniun europeica - la glista naira da las societads aviaticas malsegiras. Ils ultims onns ha quai dà plirs accidents grevs cun aviuns en l'Iran. Savens era para il nausch stan tecnic dals aviuns stà la culpa. Ils ultims 15 onns ha quai dà almain 6 accidents grevs cun plirs tschients da persunas mortas.

RR novitads 11:00+