Siglir tar il cuntegn

Header

cuntegn

Exteriur Auto charrescha en fulla da persunas a New York

Suenter ch'in auto è charra en ina fulla da persunas al Times Square a New York, conferma il president da la citad, Bill de Blasio, ch'i saja morta ina dunna e 23 persunas sajan blessadas. L'um arrestà saja stà en l'armada, tar la Navy.

  • A New York è in auto charrà enturn mezdi, temp local, en ina fulla da persunas al Times Square a Manhattan.
  • Tenor indicaziuns dal president da la citad, Bill de Blasio, è ina dunna da 18 onns morta. 23 ulteriuras persunas èn vegnidas blessadas.
  • L'auto era charrà sur il passape or e lura stà a pender vid pollers a l'ur da la via.
  • Il manischunz saja stà sut l'influenza da drogas u d'alcohol. El è vegnì arrestà.
  • Tenor de Blasio na dettia naginas indicaziuns per in act terroristic.

Al Times Square a New York è in auto charrà en ina fulla da persunas. Tenor il president da la citad, Bill de Blasio, saja ina giuvna da 18 onns morta e 23 persunas vegnidas blessadas. In um è vegnì arrestà. Tenor in rapport da la «New York Times» saja l'um stà sut l'influenza d'alcohol u da drogas. De Blasio ha confermà durant ina conferenza da pressa che l'um saja in schuldà cun in chasti precedent. Quai chastì haja el survegnì pervi da charrar sut l'influenza d'alcohol. El haja 26 onns e saja da la Bronx, in quartier da la citad.

I na dettia naginas indicaziuns ch'i sa tractia d'in act terroristic, ha ditg de Blasio durant la conferenza da pressa.

La polizia da New York scriva sin Twitter ch'i sa tractia probablamain d'in cas isolà. Las investigaziuns en chaussa cuntinueschan.

Il Times Square amez Manhatten tutga tar ina da las pli enconuschentas attracziuns da la citad da New York. Igl è er in dal lieus ils pli populads da la metropola. En questa part da la citad hai blers biros, stizuns sco era teaters ed ustarias. Mintga di passan radund 300'000 persunas sur questa plazza vi.

RR novitads 20:00

Artitgels legids il pli savens