Siglir tar il cuntegn

Exteriur Austria vul introducir controllas al Brenner

En vista ad adina dapli fugitivs ch’arrivan en l’Italia, vul l’Austria introducir controllas al Pass dal Brenner e staziunar schuldada en la regiun da cunfin tar l’Italia.

Fugitivs-
Legenda: Bunamain 84'000 fugitivs èn dapi l'entschatta da l'onn arrivads sur la Mar Mediterrana en l’Italia. Keystone
Hans Peter Doskozil.
Legenda: Minister da defensiun da l'Austria, Hans Peter Doskozil, Keystone

Sco il minister da defensiun, Hans Peter Doskozil, ha ditg en in’intervista cun ina gasetta austriaca vul ins introducir controllas al Pass dal Brenner. Questas mesiras sajan inevitablas sch’il dumber da fugitivs na sa reduceschia betg. Per la segirada dals cunfins fissan tenor rapports 750 schuldads disponsibels. Gia la fin d'emna ha il minister da defensiun spustà quatter vehichels armads en la regiun da cunfin.

Era auters pajais fan controllas

Pervia dal grond dumber da fugitivs ha la Germania gia il settember 2015, sco emprim pajas da Schengen, introducì controllas da cunfin en Baviera. Silsuenter èn suandads l'Austria, il Danemarc, la Svezia e la Norvegia. Fin uss controllescha l’Austria mo il cunfin cun l’Ungaria. Els preparan dentant gia daditg ina serrada dal pass dal Brenner vers ils cunfins da l'Italia.

Adina dapli fugitivs

Tenor indicaziuns da las Naziuns Unidas èn l’emprima mesadad da quest onn bunamain 84'000 fugitivs arrivads sur la Mar Mediterrana en l’Italia. Quai è in plus da 20% cumpareglià cun la medema perioda da l’onn passà. Dapli che 2'000 carstgauns èn dapi l'entschatta da l'onn vegnids per la vita sin il viadi surmar.

RR novitads 06:00