Siglir tar il cuntegn

Exteriur Austria serra set moscheas

La regenza austriaca serra set moscheas en l'entir pajais. Latiers bandischescha ella plirs imams da la Tirchia. Quai ha ditg il chancelier federal Sebastian Kurz. Islam politic e radicalisaziun n'hajan betg plaz en l'Austria.

Moschea en l'Austria.
Legenda: Set moscheas en Austria ston serrar lur portas (maletg da simbol). Keystone

Sco il chancelier federal Sebastian Kurz ha declerà il venderdi a Vienna, ha l'Uffizi da cultus ch'è responsabel per dumondas da religiun, cumandà da serrar las moscheas. Argumentà ha l'uffizi questas serradas cun surpassaments da la lescha da l'islam. Uschia aveva l'uniun culturala tirca-islama manà si l'avrigl da quest onn en ina moschea a Vienna gieus da guerra cun uffants. Sin fotografias era da vesair co uffants salutavan cun bandieras tircas ed auters uffants giaschevan giun plaun sco morts.

Serrada vegn ina moschea a Vienna. I vegn suspectà che quella stettia sut l'influenza da d'in moviment ultranaziunalistic da la Tirchia. Er schliada vegn la cuminanza da cultus araba cun sis moscheas.

Il minister da l'intern Herbert Kickl ha declerà che radund 60 dals total 260 imams en l'Austria sajan en il visier da las autoritads. Pervia da finanziaziun da l'exteriur - ch'è scumandada en l'Austria - savessan els perder lur dretg da dimora. Per consequenza stuessan els bandunar la tiara ensemen cun lur confamigliars. Pertutgads da quellas mesiras fissan lura en tut 150 persunas.

RR novitads 12:00