Austria serra part da l’autostrada pervia dals fugitivs

La polizia austriaca ha serrà ina part da l'autostrada che va sur il cunfin tranter Austria ed Ungaria. Ella argumentescha la decisiun cun la segirtad. Blers fugitivs sajan a pe sin l'autostrada.

Fugitivs van a pe sin l’autostrada per vegnir da l’Ungaria en l’Austria.

Legenda da maletgs: Fugitivs van a pe sin l’autostrada per vegnir da l’Ungaria en l’Austria. Keystone

La notg han danovamain 3'500 fugitivs surpassà il cunfini, rapporta l'agentura da novitads apa. Ils pli blers fugitivs sajan viagiads cun il tren datiers al cunfin e lura ids vinavant a pe.

Taffic da trens resta bloccà

Entant han las Viafiers austriacas ÖBB communitgà ch’il traffic da trens tranter l'Austria e l'Ungaria resta bloccà durant la fin d'emna. Quai saja necessari per stabilisar la situaziun en las staziuns da viafier a Vienna nua ch'ils fugitivs vegnan tgirads.

L'Ungaria perencunter ha tramess 3'800 schuldads al cunfin ungarais cun la Serbia per intensivar la construcziun da la saiv da 175 kilometers.

Centers per emprima registraziun

La situaziun actuala dals fugitivs occupa era l’UNHCR, l'autcumissariat da l'ONU per fugitivs. Quel pretenda numnadamain ussa da l'Uniun europeica ch’ella installeschia centers per l'emprima registraziun da fugitivs als cunfins externs da l'Europa – pia en Grezia, Italia ed Ungaria.

I saja bain bun che la cumissiun da l'UE haja decidì da prender si e reparter 160'000 fugitivs da l'Ungaria, l'Italia e la Grezia sin auters stadis da l'UE. Quai saja però mo in emprim pass. I dovria anc dapli.

Crusch Cotschna Svizra augmenta agid per fugitivs

Entant ha la Crusch Cotschna Svizra communitgà ch’ella augmentia l'agid per fugitivs tras l'Europa per 2,8 milliuns francs. Ella sa participeschia uschia a l'agid da la crusch cotschna en il Libanon, la Grezia e la Serbia, communitgescha l'organisaziun d'agid. La Crusch Cotschna Svizra ha impundì ils ultims onns radund 7 milliuns francs per carstgauns sin la fugia.

RR novitads 12:00/14:00