Exteriur - Austria ponderescha da spustar elecziun dal president
En l'Austria smanatscha in spustament d’elecziun dal president dal pajais. Il motiv saja in sbagl da producziun tar ils documents d'elecziun per eleger cun posta. Quai ha declerà il minister da l'intern Wolfgang Sobotka.
L'elecziun è planisada per ils 2 d'october. Sobotka lascha examinar in spustament suenter ina seria da pannas cun cartas d'elecziun. I vegnia examinà la situaziun giuridica e l'emna proxima vegn il minister da l'intern a publitgar detagls, uschia communitgescha il ministeri. La Dretgira constituziunala aveva abolì l'elecziun decisiva dal matg pervi da sbagls da furma.
