Siglir tar il cuntegn

Exteriur Austria interrumpa traffic da viafier cun l’Ungaria

Entant ch'ils trens da fugitivs en il Danemarc circuleschan puspè ha l'Austria interrut il traffic da viafier cun l'Ungaria. La viafier austriaca discurra d'ina surchargia massiva dal traffic or da l'Ungaria.

Las colliaziuns da Railjet sco era da trens regiunals sur cunfin tranter Vienna - Budapest e Budapest – Vienna èn interruttas.
Legenda: Las colliaziuns da Railjet tranter Budapest e Vienna èn interruttas. Keystone

Ils trens che vegnian or da l’Ungaria en l'Austria, sajan uschè plains, ch’ins na dastgia betg pli laschar circular quels vinavant, ha la viafier austriaca ÖBB communitgà. Ils ristgs sajan memia gronds. La notg è il dumber da fugitivs creschì marcantamain. Passa 3'000 fugitivs èn vegnids sur il cunfin a Nickelsdorf.

Tschients fugitivs spetgan gia a Budapest

A la staziun da l’ost da Budapest spetgan entant plirs tschients fugitivs sin ina pussaivladad da bandunar il pajais. Sur in megafon ha in fugitiv declerà la nova situaziun e ditg ch'ils carstgauns duain cumprar in bigliet fin ina staziun da cunfin. Da là anora possian els lura ir a pe sur in cunfin.

Saiv dispitaivla gia avant a fin

Tenor la polizia austriaca èn radund 1'000 persunas vegnidas oz a pe sur il cunfin. Ed entant quinta l'Ungaria che la saiv dispitaivla saja finida gia l'entschatta d'october – pia in mais pli baud che planisà. La saiv da 4 meters autezza e 175 kilometers lunghezza duai tegnair enavos fugitivs che vulan vegnir en l'Ungaria.

RR novitads 16:00