L'Austria abolescha per trais mais l'obligatori da mascras. Perquai ch'il dumber da las infecziuns novas sa reducescha ston ins mo pli purtar mascrinas en ospitals ed en chasas d'attempads e da tgira. Quai vala a partir dal prim da zercladur.
Cun quest pass na veglian ins dentant tuttavia betg annunziar la fin da la pandemia, avertescha il minister da sanadad Johannes Rauch. L'obligatori da mascras – che vala per entant anc en ils super-martgads, drogherias, tancadis ed en il traffic public – vegnia sulettamain interrut per il temp da stad. La mascra vegnia a turnar. Tut ils scenaris quintian ch'ina u l'autra varianta dal coronavirus effectueschia l'atun puspè in'unda d'infecziuns.
Legenda:
Il minister da sanadad Johannes Rauch da la Partida verda annunzia ina pausa da mascrinas per la stad.
Keystone