Siglir tar il cuntegn

Exteriur Australia quinta cun ulteriurs tocs dal vrac

In emprim toc da vrac dal sgol MH370 è identifitgà, la tschertga suenter l'aviun da la Malaysia Airlines cuntinuescha. Els sajan optimistic ch'els tschertgian en il dretg territori ed els chattian là l'aviun. Quai ha ditg Martin Dolan, il schef da l'autoritad per la segirezza da sgol australiana.

4 umens examineschan in toc dal vrac da l'eroplan MH370
Legenda: L'Australia quinta cun ulteriurs tocs da vrac dal sgol MH370 ch'è sparì dapi ils 8 da mars 2014. Reuters

L'Australia coordinescha la tschertga dal vran en l'Ocean indic. La tschertga cuntinueschia ha era garantì il primminister Tony Abbott. «Els debiteschian a las famiglias da las persunas sparidas, d'empruar da schliar l'engiavinera» ha ditg Abbott en il radio.

La mesemna avevan il primminister da la Malaysia, Najib Razak, confermà che la part dal aviun chattà sin l'insla La Réunion «saja definitivamain» d'in aviun Boeing 777. (L'aviun sparì MH370 da la Malaysia Airline era ina Boeing 777). Las autoritads franzosas ch'èn responsablas per las examinaziuns n'han anc betg conferm ch'il toc chattà è dal aviun MH370. La giustia franzosa ha discurrì d'ina «supposiziun fitg ferma» ch'i sa tractia da l'aviun sparì.

Conchiglias pudessen mussar la via

Tenor stimaziun da perscrutaders pudessen per exempel conchiglias sin il toc da vrac inditgar, en tge regiun che l'aviun è crudà en la mar. Vitiers pudess l'analisa dal material purtar resultats davart la fermezza e l'angul dal sfratg, quai tenor experts d'aviatica.

Il sgol MH370 è svanì ils 8 da mars 2014 dal radar. L'eroplan da la Malaysia Airlines era sin viadi da Kuala Lumpur a Peking.

Famiglias èn scepticas

Las famiglias dals passagiers chinais han reagì cun gronda sceptica sin l'identificaziun probabla dal toc da vrac. «I saja memia baud da dir, ch'i saja passà» ha ditg Wang Zheng a l'agentura da pressa tudestga DPA. Ses geniturs eran en l'eroplan. Intgins parents sa tegnan vid la pussaivlada che la maschina è vegnida rapinada u ch'ella è sa platgada d'urgenza e che las persunas a bord vivan anc. Intginas persunas han l'impressiun che la Malaysia veglia serrar giu la chaussa uschè spert sco pussibel ed uschè bunmartgà sco pussibel, uschia èn s'exprimidas singulas persunas.

RR novitads 06:00