Siglir tar il cuntegn

Exteriur Aurora tranter la Serbia e la Croazia?

Ils dus vischins en discordia, la Serbia e la Croazia, vulan terminar lur dispita da blers onns. Il schef da la regenza serba, Aleksandar Vucic e la presidenta da la Croazia, Kolina Grabar-Kitarovic han suttascrit ina decleraziun correspundenta.

purtret da Aleksandar Vucic e Kolinda Grabar-Kitarovic
Legenda: Aleksandar Vucic, primminister Serbia, e Kolinda Grabar-Kitarovic, presidenta Croazia. RTR

Ordavant eran ils dus politichers s'inscuntrads entamez la punt da la Donau tranter Erdut (Croazia) e Bogojevo (Serbia). Omaduas varts han ludà la cunvegna sco istorica.

Ils vischins vulan reglar lur dispitas da cunfin e perscrutar il destin dals sparids dal temp da la guerra tranter il 1991 ed il 1995. Ultra da quai duai il commerzi vegnir stimulà e las dispitas davart la facultad da l'anteriura Jugoslavia duain vegnir terminadas.

La finala duain er las minoritads naziunalas en ils dus stadis survegnir dapli dretgs. L'onn passà han ils dus pajais cumenzà ina vaira guerra economica pervi da la crisa da fugitivs. Cun agid da l'UE han ins pudì terminar questa guerra.

RR novitads 06:00