Attentat ad Ankara cun almain 28 morts

En la chapitala tirca Ankara hai dà in attentat cun blers morts en in quartier da la regenza. Sco il biro dal guvernatur rapporta, sajan almain 28 persunas vegnidas mazzadas da l’attentat. Plinavant duai quai dar almain 61 blessads.

Ils pumpiers cumbattan il fieu suenter l'explosiun.

Legenda da maletgs: Ils pumpiers cumbattan il fieu suenter l'explosiun. Keystone

Tenor rapports uffizials dal biro dal guvernatur èn almain 28 persunas vegnidas mazzadas.

Plirs vehichels militars sco mira

La mira da l’attentat era in convoi da vehichels militars en il quartier da la regenza Cankaya, sco il militar tirc ha confermà. Ils vehichels transportavan persunal da las forzas armadas. La bumba saja detonada, cura ch'ils vehichels dal militar sajan sa fermads davant in'ampla.

Sco reacziun sin l’attentat ha il primminister tirc Ahmet Davutoglu dà giu sia visita a Brüssel. Là vuleva el prender part a discurs sur da la crisa da fugitivs.

PKK refusa d'esser responsabla

Tenor il primminister tirc Ahmet Davutoglu haja la partida curda PKK e d'ina milissa curda da la Siria fatg l'attatga da bumba. L'attentader saja in Sirian da 23 onns. Fin ussa sajan 14 persunas suspectadas vegnidas arrestadas, uschia il Davutoglu vinavant.

La PKK refunsa dentant d'esser responsabla per l'attentat. Els na sappian betg tgi che haja fatg quai.

Manar vianvant il cumbat cunter il terror

En ina declaraziun ha il president da la Tirchia, Recep Tayyip Erdoğan annunzià ch'il pajais vegnia a manar vinavant il cumbat cunter il terror e quai cun anc dapli resolutezza. I sa tractia d'ina attatga sin l'entira naziun. La Tirchia vegnia a far diever dal dretg da sa defender.

RR novitads 20:00