Dapli da la citad
Las autoritads han curregì il numer da victimas da 10 sin 14 suenter l’attentat a St. Petersburg. 11 persunas sajan mortas al lieu e trais autras per consequenza da las blessuras en l'ospital. 49 persunas èn anc adina en l'ospital. Quai ha communitgà mardi la ministra da sanadad, Weronika Skworzowa, tenor l’agentura da novitads russa Tass.
Divers fastizs
Las autoritads supponan ch’i sa tractia d’in attentat da terrur. En l'internet cursavan glindesdi fotografias d’in um cun barba e mantel lung. Quel haja sa drizzà gia glindesdi saira a la polizia e segirà ch’el n’haja da far nagut cun l’attentat. La polizia al craja. Quai rapportan diversas agenturas.
Tenor divers rapports da medias tschertgian las autoritads in um da Kirgistan. El duai avair 23 onns ed avair ragischs islamicas fundamentalisticas. Las autoritads a Bischkek hajan offert lur sustegn per retschertgas. Autras funtaunas rapportan però era d’in fastiz en il Kasachstan.
Igl n'è betg cler sche turits èn tranter las victimas
Anc adina n’è betg cler, sch’era turists e persunas da l’exteriur èn tranter las victimas. Igl n’è er betg enconuschent, sche l’attentat ha in connex cun l’organisaziun da terrur Stadi islamic u cun il terrorissem en Tschetschenia. Il president russ Vladimir Putin ha ditg glindesdi, che las autoritads retschertgian en tut las direcziuns.
Bumba en vagun da metro
En in vagun da metro a St. Petersburg è explodì glindesdi a las 14.40 (temp local) ina bumba. La metro era sin via tranter las staziuns Sennaja Ploschtschad e l'Institut tecnologic. Il manischunz ha cuntinuà il viadi fin la proxima staziun (Institut tecnologic), nua ch’il persunal da salvament è arrivà ed ha gidà.
Ina segunda bumba han las autoritads chattà circa il medem temp en in’autra staziun da metro e pudì neutralisar quella.
RR novitads 11:00