Il suspectà saja vegnì en ina controlla da rutina da la polizia venderdi en damaun a las 03:30. Cur che la polizia haja pretendì la carta d'identitad da l'um haja quel tratg in'arma e cumenzà a sajettar sin la polizia. Cun sajettar enavos ha la polizia tutgà l'um mortalmain. In polizist saja vegnì blessà. El na saja dentant betg en privel da vita.
Il minister da l'intern da l'Italia ha confermà ch'i sa tractia senza dubi da l'um ch'è vegnì tschertgà ils ultims dis da la polizia. L'identitad da l'um aveva la polizia chattà ora cun agid d'improntas dals dets ch'eran vegnidas chattadas en il camiun.
Dapi gievgia era la polizia a la tschertga da l'um suspectà. I dat strusch anc dubis che quai um haja er propi commess l'attentat a Berlin. Quai pervi da las improntas da la detta chattadas en il camiun e pervi dals palpiris uffizials ch'el haja laschà en il camiun. Para che l'um saja vegnì l'onn 2015 sur Freiburg en la Germania.
12 persunas eran mortas da l'attentat
Glindesdì è in um charrà cun in camiun en persunas che visitavan gist ina fiera da Nadal a Berlin ed ha uschia mazzà 12 persunas. Radund 50 persunas èn vegnidas blessadas durant l'attentat.
RR novitads 11:00
