L'um da 28 onns era sa siglientà en l'aria en in parc a Lahore datiers d'ina plazza da giugar. Là festivavan famiglias cristianas gist la festa da Pasca. In pledader dals Talibans dal Pakistan ha declerà envers medias ch'els hajan recrutà l’um. L’attatga saja sa drizzada cunter cristians e cunter la regenza.
La regenza aveva intensivà ils ultims 15 mais sia offensiva cunter ils Talibans.
Attentat cun massa unfrendas
L'attatga dad ier ha chaschunà la mort d'almain 70 persunas. Bunamain la mesadad da las unfrendas èn uffants e dunnas. Ultra da quai èn radund 335 persunas sa blessadas. L'attentader aveva laschà detunar bun 20 kilos material explosiv. Tenor la polizia aveva l'um ultra da quai struvas e vairas en ses satgados. Entras il squitsch sajan quellas catapultadas tras il parc ed hajan blessà numerusas persunas lunsch enturn.
RR novitads 14:00