Siglir tar il cuntegn
Inhalt

Exteriur Attentader da Barcelona è mort

La polizia spagnola ha sajettà giu il suspectà principal da l'attatga da Barcelona. Quai ha ella confermà via Twitter.

Plirs policists spagnols.
Legenda: Policists en acziun datiers da Subirats, en il vest da Barcelona. Keystone
  • Tenor conferma da la polizia è il suspectà principal mort tar in sajettim datiers da Barcelona.
  • Tenor la polizia haja ella sajettà giu l'um che purtava ina tschinta cun material explosiv a Subirats, en il vest da la metropola catalana. I saja però be stà in'attrappa.
  • Las autoritads avevan glindesdi avantmezdi confermà l'identitad dal suspectà principal: I sa tracta dad in Marocan da 22 onns.
  • Il dumber d'unfrendas è entant s'augmentà sin 15.

Quatter dis suenter l'attatga terroristica da Barcelona ha la polizia mazzà il suspectà principal. Il Marocan da 22 onns è vegnì sajettà giu datiers dal lieu Subirats. Quai han confermà las autoritads. Via Twitter aveva la polizia spagnola infurmà davart l'acziun en vischinanza da Subirats en il vest da Barcelona.

Dumber d'unfrendas s'augmentà

Tar l'attatga sin il boulevard «Las Ramblas» eran almain 13 persunas vegnidas mazzadas e passa 120 vegnidas blessadas la gievgia passada. Radund 50 dals blessads sajan anc en l'ospital, ils ulteriurs hajan entant pudì bandunar quel.

Sco quai ch'il minister da l'intern catalan, Joaquim Forn, ha ditg, saja er cumprovà che l'attentader en fugia haja cuntellà in Spagnol da 34 onns a Barcelona suenter ch'el saja charrà en la fulla. Da quest um haja l'attentader engulà l'auto per fugir.

Il Departament d'affars exteriurs ha confermà che nagins burgais svizzers na sajan tranter las unfrendas da las attatgas da Barcelona e da Cambrils.

Ils investigaders supponan che las attatgas da Barcelona e Cambrils sajan vegnidas fatgas dad ina rait che sa cumponia da radund in tozzel da suspectads.

RR novitads 18:00++