Exteriur - Attatgas da cyber sin servers en Tirchia
En la Tirchia blocheschan attatgas da hackers dapi plirs dis servers da l'internet. I sa tractia d’attatgas seriusas, ha ditg il minister da communicaziun da la Tirchia. Pertutgadas èn tranter auter era bancas.
Plirs instituts da finanzas han communitgà che l'access a lur paginas d'internet saja da temp en temp interrut.
L’interpresa ch’administrescha adressas d’internet tircas ha communitgà che las attatgas derivian da funtaunas organisadas da l’exteriur. Medias tircas speculeschan che la Russia pudess esser responsabla. Auters supponan che la gruppaziun da hackers «Anonymous» è l’origin da las attatgas.
