Siglir tar il cuntegn
Inhalt

Exteriur Attatga da cyber vul procurar per chaos

L'attatga da cyber fatschenta anc adina bleras interpresas pertutgadas. Ils attatgaders vulan surtut procurar per chaos.

Visur da computer cun avis da l'attatga.
Legenda: Interpresas battan cunter attatga da cyber. Keystone

Suenter la segunda attatga massiva da cyber entaifer dus mais sin l’entir mund han anc bleras interpresas da sbatter cun las consequenzas. Para vulan ils attatgaders surtut procurar per chaos, uschia vegnan ils experts citads da las agenturas da novitads.

Interpresas pertutgadas èn tranter auter il producent d’ieli russ Rosneft, la viafier franzosa SNCF, e la pli gronda societad da navigaziun mundiala Moeller Maersk. Lezza interpresa rapporta ch’els na possian anc adina betg tractar novas empustaziuns ed il mument na saja betg cler cura ch’ils sistems funcziunan senza problems, vegnan managers da Maersk citads da las agenturas da novitads. Surtut pertutgadas eran interpresas en l’Ucraina.

Sis interpresas svizras pertutgadas

Pertutgads da l’attatga sajan era sis interpresas Svizras. Quai ha confermà il center d’annunzia e d’analisa per la segirtad d’infurmaziun MELANI envers l’Agentura telegrafica svizra (SDA). Da tge interpresas ch’i sa tracta n’ha il center però betg tradì. L’uffizi MELANI è per il mument anc occupà cun l’analisa da la software che procura per problems. Infurmaziuns pli detagliadas na po l’uffizi pervia da quai anc betg far.

RR novitads 12:00