La Germania veglia megliurar la defensiun tar attatgas terroristicas. Plinavant ha la chanceliera annunzià da danovamain vulair inscuntrar ils confamigliars ed ils blessads da l’attentat en intgins mais.
Critica envers la regenza
En ina brev averta avevan quels crititgà la regenza tudestga però er il senat da Berlin e las autoritads da segirezza. Il stadi n’haja tranter auter betg sustegnì els avunda. A la chanceliera han els rinfatschà da mai esser sa drizzada persunalmain als confamigliars e pertutgads.
L’attatga haja destruì la vita da fin qua per bleras persunas, ha ditg Merkel. La regenza vegnia a far tut il pussaivel per ch’ils pertutgads da l’attatga chattian puspè enavos en la vita.
Sa participads a la ceremonia èn dasper Merkel er il president Frank-Walter Steinmeier u er il president dal Bundestag Wolfgang Schäuble. Els han evidà chandailas e mess quella al lieu da commemoraziun.
11 morts e passa 70 blessads
Ils 19 da december 2016 era in um charrà cun in camiun sin il Breitscheidplatz e mazzà 11 persunas, radund 70 ulteriuras eran per part vegnidas blessadas grevamain.