Siglir tar il cuntegn
cuntegn

Exteriur Astana: Svizra fa sin «Flower Power»

La Svizra sa mussa a l'exposiziun mundiala ad Astana en il Kasachstan cun in pavigliun sut il num «Flower Power». En quel vul la Svizra mussar ses know-how tar l'effizienza d’energia, tar energias regenerablas ed aua.

Persunasen in pavigliu. Bler na vesins betg.
Legenda: Emprimas visitadras da las medias èn gia amez il «Flower Power» svizer. Keystone

Il slogan «Flower Power» stettia per la forza da la natira e ses potenzial en furma da novas energias, uschia ils responsabels svizzers avant las medias. Il pavigliun è trapartì en quatter chasas tematicas: En la chamona da Monte Rosa, la chasa da Rösti, la chasa d'aua e la chasa da las innovaziuns svizras.

Avertura da «Future Energy» ils 10 da zercladur

L’exposiziun mundiala e cun ella er il pavigliun svizzer vegn avert sonda, ils 10 da zercladur. En tut sa preschentan 110 pajais cun lur soluziuns per l’avegnir da l’energia. Il tema da l’exposiziun è «Future Energy» – è quai en in pajais, ch’è enconuschent en emprima lingia pervi da sia producziun dad ieli e gas.

Differentas colliaziuns tranter Svizra e Kasachstan

La Svizra represchenta en la uschenumnada gruppa da Helvetistan ils interess casachs en ils gremis da la banca mundiala. Er l’economia svizra s’interessa dapi in temp per il pajais, che ha tant ina regenza autoritara sco er diversas ritgezzas natiralas en furma da materias primas.

RR novitads 15:00

Astana e l'expo

Szena da citad l'enviern.
Legenda: Keystone

Astana è amez la tundra casaca e vala sco segund fraida chapitala dal mund. L’exposiziun mundiala duai accelerar anc ina giada il boom da la citad, ch’è creschida ils ultims onns per 400’000 persunas. Kasachstan na vul betg mo pussibilitar il barat da know-how tranter ils participants ma er sa preschentar ad investiders en la meglra glisch.