Tut en tut han catastrofas da la natira chaschunà l'emprim mez onn dal 2022 donns da 65 milliardas dollars. Quai èn 40 milliardas pli pauc ch'avant in onn.
Passa la mesadad da quests donns han assicuranzas stuì surpigliar. E gliez è pli u main tuttina bler sco durant la medema perioda da l’onn avant. La raschun per questa discrepanza è, ch’ina gronda part dals donns èn succedids en ils Stadis Unids ed en l’Australia. En questas regiuns èn surproporziunalmain bleras valurs segiradas.
En ils Stadis Unids han tornados extrems chaschunà donns da milliardas. Parts da la costa da l'Australia da l’Ost èn vegnidas innundadas, ed en l’Europa dal Sid regian chaliras, guauds brischan ed igl è sitgira.