Assad na crai betg vi da pausa da cumbat en Siria

Il president da la Siria Bashar al-Assad na crai betg ch'i saja pussaivel da realisar ina pausa da cumbat. Cunzunt na saja ina tala pausa betg pussaivla entaifer in'emna, sco quai che la Russia, ils Stadis Unids e 15 auters pajais avevan decis il venderdi passà.

Il president da la Siria, Bashar al-Assad.

Legenda da maletgs: Na crai betg vi d'ina pausa da cumbat. Il president da la Siria, Bashar al-Assad. Keystone

Ina pausa da cumbat saja mo pussaivla tranter armadas e pajais, ma betg cun terrorists, uschia Assad. Per el haja il cumbat cunter il terrorissem prioritad, tant uss sco en il futur.

Pausa da cumbat munta impedir ils terrorists

En la televisiun siriana ha Assad era ditg, ch'ina pausa da cumbat na veglia betg dir che tut las armas taschian. Ins stoppia plitost impedir ils terrorists da rinforzar lur posiziuns. El ha exprimì ses dubi envers la realisaziun d’ina pausa da cumbat, sco quai che la conferenza da segirezza a Minca aveva proponì l’emna passada.

La schliaziun dals conflicts en Siria schai per Assad en cunvegnas da pasch localas. Midadas politicas en la Siria stoppian vegnir fatgas a terra e sin basa da la constituziun existenta. Ina regenza transitorica muntass da s’allontanar da la constituziun actuala.

RR novitads 06:00